البنت زى الولد...مهوش كمالة عدد

**Admin** الأربعاء أغسطس 11, 2010 2:53 pm

البنت زى الولد
مهش كمالة عدد

الله يرحمك يا سعاد حسنى
ويغفر ليكى

ده كان آخر عهدى بالتلفيزيون قبل الاعتزال
ان البنت زى الولد
يمكن دلوقتى البنت ضعف الولد
افتره بأه

مهو زماااااان ايام سى السيد
كانت البنت ربع الولد
او يمكن اقل

أخرة المقدمه دى ايه
يا ام العيال أرفتينا

(ده انتو اللى بتقولو)

خلاص خلاص حدخل فى الموضوع

(ده انا اللى بقول)

اعجب للأم التى تربي بيدها سى السيد
نحن فى زمن اصبحت أعباء الحياه فيه
لاتطاق ولا يستطيع الرجل بمفرده حملها
فما بالك بسى السيد اعتقد انه لو سافر
بره يغسل صحون كان خد ضرب على
قفاه لصبح مهو عمره مدخل مطبخ

اعجب لبعض البيوت التى تتحمل فيها البنت
كل اعمال المنزل بينما اخيها(سى سيد المستقبل)
نايم او بيلعب ده حتى ممكن كمان تجبله الاكل لحد
عنده

وصدقونى رأيت مثل ذلك
صحيح ان ده قل كتير عن زمان
بس برده فى بيوت لسه كده

اما بأه المصيبه الثانيه
ان الام تربى بنتها انها تكون:::: نقول أيه
ست السيد واللهى معرفه
وده للأسف الحال السائد الان

أحذرى ايتها الام من ان تربى
تنبلة السلطان

مفيش حاجه اسمها وراهم مذكره
لازم كل واحد يتحمل مسؤليه فى
البيت حتى لو صغيره
حتى لو عندك خادمه
انا بشغلهم معاها

ولكى بعض هذه الاعمال
-ترتيب السرير
-تعليق الملابس
-جمع الالعاب بعد اللعب بها
-تنظيف الاحذيه
-تلميع البيت
-ملأ زجاجات المياه الفارغه
-حمل ونقل طلبات المنزل من السياره
(حتى لو فى بواب لازم يشيل معاه)
-غسيل الاطباق
-تنظيف مائدة الطعام
-غسل حقيبة المدرسه
-تطبيق الغسيل
-المساعده فى المطبخ

وأشياء كثيره أخرى
صدقونى كل ده اولادى بيعملوه معايا
مكدبش عليكم كنت بعيد كل حاجه عملوها
بس دلوقتى انا مرتاحه وهما كمان حيدعولى فى المستقبل
ابنى عمره 7 سنوات تعلم تطبيق الغسيل
ومش اى كلام انا منظمه جدا وبحب الغسيل
يكون تطبيقة المكوى كأنك شرياه من بره
صحيح كنت بقلب الغسيل واطبقه تانى بعدهم
بس دلوقتى مرتاحه
واكيد هما كمان حيرتاحو فى بيوتهم كمان

جربى كده ومش حتندمى بس طولى بالك
ولو حصل وغضبو براحه فهميهم ان ده
عشان مصلحتهم وان الدنيا لا تدوم على حال
وأن الرسول عليه الصلاة والسلام كان
فى مهنة أهله واحنا بنحب الرسول
وحده وحده وأن شاءالله تجدى ما يسرك

وتكونى ام مستمتعه بأرف العيال
وتكون البنت زى الولد
مهوش كمالة عدد

ومتنسوش تدعولى